Mamajusi na Nyota

Baada ya Yesu kuzaliwa Bethlehemu, Mamajusi kutoka mashariki waliona nyota yake. Wakasafiri hadi Yerusalemu, wakauliza, "Yuko wapi yeye aliyezaliwa Mfalme wa Wayahudi? Tumekuja kumsujudia." Mfalme Herode alifadhaika. Aliambiwa na walimu kwamba Kristo angezaliwa Bethlehemu, akawatuma Mamajusi huko na kuwaomba warudi kumpa habari.

Nyota ikawatangulia mpaka ikasimama juu ya mahali alipokuwa mtoto. Mamajusi wakafurahi sana kuiona nyota ile, wakaingia ndani ya nyumba, wakamwona mtoto Yesu pamoja na Maria mama yake. Wakamsujudia na kumpa zawadi za dhahabu, uvumba na manemane. Kisha Mungu akawaonya katika ndoto wasirudi kwa Herode, nao wakarudi kwao kwa njia nyingine.